လာရာလမ်းကို ပြန်ရမလား ကိုဗင်ထရီ

လာရာလမ်းကို ပြန်ရမလား ကိုဗင်ထရီ

ပရီးမီးယားလိဂ်ကို ပြန်ရောက်အောင် ကိုဗင်ထရီက ၂၅ နှစ်ကြာစောင့်ဆိုင်းခဲ့ရတယ်။

သူတို့ရဲ့၂၅ နှစ်ကြာ ပရီးမီးယားလိဂ်အိပ်မက်ဟာ ဆပ်ပြာပူဖောင်းလိုမျိုး အလွယ်တကူပြိုကွဲခဲ့တယ်။

မျှော်လင့်ချက်တွေနဲ့ ပရီးမီးယားလိဂ်ခရီးအစဟာ လေးပွဲဆက်အရှုံး၊ ဘဲဉမကွဲတဲ့မှတ်တမ်းကြောင့် အရုပ်ဆိုးသွားပါတယ်။

လက်ရှိရာသီအစ ငရဲခန်းဟာ ၁၉၁၉-၂၀ ရာသီနောက်ပိုင်း ကိုဗင်ထရီအတွက် ရာသီအစအဆိုးရွားဆုံးမှတ်တမ်းပါ။

၁၉၁၉-၂၀ ရာသီမှာ ကိုဗင်ထရီက ပထမဆုံးလိဂ်ပြိုင်ပွဲ ကစားပြီး ရာသီအစ ၉ ပွဲဆက်ရှုံးဖူးတယ်။

ဒါဘီကောင်တီ (၁၈၉၉-၁၉၀၀)၊ စတုတ်စီးတီး (၁၉၀၆-၀၇)၊ ပရက်စတန်နော့အန့် (၁၉၂၄-၂၅)၊

ခရစ္စတယ်ပဲလေ့စ် (၂၀၁၇-၁၈)အသင်းတွေပြီးရင် ကိုဗင်ထရီက ရာသီအစလေးပွဲမှာ ဂိုးမသွင်းနိုင်ဘဲ

ရှုံးနိမ့်တဲ့ငါးသင်းမြောက်အသင်းဖြစ်လာပါတယ်။

ကိုဗင်ထရီက မန်စီးတီးနဲ့ ပရီးမီးယားလိဂ် ပွဲစဉ် ၃ မှာ အမှတ်ရလုနီးပါး တုံ့ပြန်နိုင်ခဲ့ပါတယ်။

မန်စီးတီးဂိုးသမား ဒွန်နာရမ်မာက ကိုဗင်ထရီတိုက်စစ်ကြောင့် ဖိအားများပြီး ဂိုးပေါက်ကန်သွင်းမှု ၁၂ ကြိမ်အထိရင်ဆိုင်ခဲ့ရတယ်။

အဲဒီပွဲမှာ ကိုဗင်ထရီက xG ၁ ဒဿမ ၃၇ အထိရှိပြီး ဂိုးမရခဲ့တာ ကံဆိုးလို့ပါ။

ဘရိုက်တန်ကို ဂိုးပြတ်အညံ့ခံရတဲ့ပွဲမှာလည်း အဖွင့်ဂိုးမပေးရခင်အထိ ကိုဗင်ထရီရဲ့စွမ်းရည်က

ကောင်းခဲ့တယ်။ ဂိုးပေါက်ကန်ခွင့် ၁၀ ကြိမ်အထိ ပိုင်ဆိုင်ခဲ့ပါတယ်။ ပထမပိုင်းပြီးခါနီးမှာ ကိုဗင်ထရီ

အဖွင့်ဂိုးပေးရသလို၊ ဒုတိယပိုင်းစပြီး သိပ်မကြာခင် နောက်တစ်ဂိုးပေးလိုက်ရတယ်။ အဲဒီနောက်

ကစားသမားတစ်ယောက်ထုတ်ပယ်ခံလိုက်ရလို့ ကိုဗင်ထရီပြန်လမ်းမဲ့ပြီး ဂိုးပြတ်ရှုံးနိမ့်ခဲ့တာပါ။

အခုလိုမျိုး ဂိုးပြတ်ရှုံးလိုက်တာဟာ ကိုဗင်ထရီရဲ့ ယုံကြည်စိတ်ကိုပိုပြီးယိုင်လဲစေတယ်။

ပရီးမီးယားလိဂ်အဆင့်အတန်းနဲ့ သူတို့ကြား မိုင်သန်းပေါင်းများစွာ ကွာခြားသလိုခံစားနေရပါလိမ့်မယ်။

သူတို့အတွက် လွတ်မြောက်လမ်းဟာ ဘယ်ဆီမှာများလဲတွေးရင်း နာကျင်နေရမှာပါ။

ပရီးမီးယားလိဂ်စတင်တဲ့ ၁၉၉၂ ခုနှစ်ကစတင်ပြီး ပရီးမီးယားလိဂ်ရာသီအစ ၄ ပွဲဆက်ရှုံးတဲ့အသင်းတွေထဲ

၂၀၁၂-၁၃ ရာသီက ဆောက်သမ်တန်တစ်သင်းတည်းသာ တန်းဆင်းဇုန်က လွတ်မြောက်ခဲ့ပါတယ်။

အဲဒီမှတ်တမ်းအတိုင်းဆိုရင် ကိုဗင်ထရီရဲ့ ရာသီပိတ်ဇာတ်သိမ်းက လာရာလမ်းဆီပြန်ရပါလိမ့်မယ်။