ကာရစ်အတွက် ကံကြမ္မာအသစ်လား..? အဆုံးသ-တ်ဇာတ်သိမ်းလား..?

မန်ယူအသင်းတာဝန်ရှိသူက ကာရစ်ကို အခွင့်အရေး ထပ်ပေးလိုက်ပါပြီ။

ချယ်လ်ဆီးအသင်းနဲ့ အဝေးကွင်းသွားရောက်ကစားရမယ့်ပွဲအတွက် မိုက်ကယ် ကာရစ်က မန်ယူအသင်းကို ဆက်လက်တာဝန်ယူ ကိုင်တွယ်သွားမှာ ဖြစ်ပါတယ်။

ရာသီအစမှာ ရလဒ်တွေ ဆိုးရွားနေပေမယ့် ကာရစ်ကို မန်ယူအသင်းရဲ့အခြေအနေကို ပြန်လည်ကောင်းမွန်အောင် လုပ်ဆောင်ဖို့ အခွင့်အရေးပေးသွားမယ်လို့

BBC Sport က ဖော်ပြခဲ့ပါတယ်။

ပြိုင်ပွဲအရပ်ရပ်မှာ ရှစ်ပွဲဆက်တိုက် နိုင်ပွဲပျောက်ဆုံးနေမှုကို အဆုံးသတ်နိုင်ဖို့ မန်ယူအသင်းနဲ့ မိုက်ကယ်ကာရစ် ကြိုးစားရမှာပါ။

ဘုန်းမောက်အသင်းကို ၃ ဂိုး ဂိုးမရှိနဲ့ ရှုံးနိမ့်ခဲ့လို့ ကာရစ်ရဲ့ မန်ယူနည်းပြ အနာဂတ်အဆုံးသတ်လုနီးပါး ဖြစ်လာတာပါ။

လက်ရှိအချိန်မှာ မန်ယူအသင်းက တန်းဆင်းဇုန်အထက် တစ်မှတ်အကွာနဲ့ သိမ်ငယ်စွာ  ရပ်တည်နေရပါတယ်။

ပြီးခဲ့တဲ့ရက်ပိုင်းအတွင်းမှာ မန်ယူအသင်းရဲ့ ထိပ်တန်းတာဝန်ရှိသူတွေက ကာရစ် နေရာအစားထိုးရအောင် နယူးကာဆယ်နည်းပြဟောင်း အက်ဒီဟောင်းနဲ့

ဂျာမနီလက်ရွေးစင်အသင်းနည်းပြဟောင်း နာဂယ်စ်မန်းတို့ကို ပစ်မှတ်ထားခဲ့ပါတယ်။

အခုတော့ ကာရစ်ဟာ ချယ်လ်ဆီးနဲ့ပွဲကို ဆက်လက်ကိုင်တွယ်ခွင့်ရရုံသာမက မန်ယူရဲ့ ကံကြမ္မာကို ပြောင်းလဲခွင့် နောက်ဆုံးအကြိမ် ရခဲ့ပါတယ်။

စတမ်းဖို့ဒ်ဘရစ်ချ်ကွင်းမှာ ကာရစ်က မန်ယူရဲ့ကံကြမ္မာကို စီရင်ခွင့်ရပေမယ့် လာမယ့် အင်္ဂါနေ့မှာ ကစားရမယ့်

ရိုးမားအသင်းနဲ့ ချန်ပီယံလိဂ်ပွဲ၊ ဗီလာအသင်းနဲ့ ပရီးမီးယားလိဂ်ပွဲတွေမှာ ဘယ်လိုဖြစ်လာဦးမလဲ?

ကာရစ်မဟုတ်ဘဲခေါင်းဆောင်အပြောင်းအလဲ မြင်ရမလား?

မန်ယူရဲ့ နောက်ဆုံးနှစ်ပွဲကစားပုံတွေက သိပ်ပြီးဆိုးရွားခဲ့လို့ ဝေဖန်မှုတွေနဲ့ ဖိအားတွေ ပြင်းထန်နေချိန်မှာ

ချယ်လ်ဆီးနဲ့ပွဲမှာ မန်ယူကစားသမားတွေ ဘယ်လိုတုံ့ပြန်ကစားမလဲ။

ကာရစ်က သူပုန်ထနေတဲ့ ဘရူနိုဖာနန်ဒက်စ်အပါအဝင် မန်ယူကစားသမားတွေကို စွမ်းဆောင်ရည်ကောင်းတွေ ပြသလာအောင် လှုံ့ဆော်ပေးနိုင်ပါ့မလား။

ဘရူနို ဖာနန်ဒက်စ်နဲ့ ကာရစ်တို့ကြားက သဘောထား ကွဲလွဲမှုတွေ ပြေလည်သွားပြီလား။

မန်ယူပရိသတ်တွေအမြင်မကြည်တဲ့ ဘောလုံးဒါရိုက်တာ ဂျေဆန်ဝီလ်ကော့စ်ရဲ့ ရာထူးကရော ဘယ်လိုဖြစ်လာဦးမလဲ။

အခုအချိန်အထိ အဖြေမရသေးတဲ့ မေးခွန်းတွေ အများကြီး ကျန်ရှိနေဆဲပါပဲ။

ချယ်လ်ဆီးဟာ ကာရစ်ရဲ့မန်ယူနည်းပြဘဝအတွက် အရေးပါခဲ့ဖူးတယ်။ ပြီးခဲ့တဲ့ရာသီက စတမ်းဖို့ဒ်ဘရစ်ချ်မှာ ပိုင်ဆိုင်ခဲ့တဲ့ အနိုင်ရလဒ်ဟာ

ကာရစ်ကို မန်ယူအမြဲတမ်းနည်းပြဖြစ်လာဖို့အတွက် အရေးပါတဲ့ ရလဒ်တွေထဲက တစ်ခု ဖြစ်ခဲ့ပါတယ်။

ဒီတစ်ကြိမ် စတမ်းဖို့ဒ်ဘရစ်ချ်ကွင်းကို သွားရောက်စီးချင်းထိုးရမယ့်ပွဲက ပိုမိုတောက်ပတဲ့ အနာဂတ်တစ်ခုရဲ့ အစ ဖြစ်လာမလား၊

ဒါမှမဟုတ် ကာရစ်ရဲ့ မန်ယူနည်းပြဘဝ အဆုံးသတ်သွားစေမယ့်ပွဲလား။