စပါးရဲ့ ၂၀၂၆ ခုနှစ်အတွင်း လေးပွဲမြောက် ပရီးမီးယားလိဂ်နိုင်ပွဲ

စပါးနည်းပြ ဒီဇာဘီက နိုင်ပွဲရအောင်နည်းမျိုးစုံ ကြံစည်ခဲ့ပါတယ်။

ကွင်းထဲမှာ အစွမ်းပြနိုင်အောင် နည်းဗျူဟာအစီအစဉ်တွေသာမကဘဲ ကွင်းပြင်ပ စိတ်ဓာတ်မြှင့်တင်ရေးအစီအစဉ်တွေပါ ဒီဇာဘီ ဖန်တီးပေးခဲ့တယ်။

ဒီဇာဘီက စိတ်ပညာရှင် ခေါ် ပြီး စပါးကစားသမားတွေရဲ့ညစ်နွမ်းနေတဲ့စိတ်ကို ပြုပြင်ပေးတယ်။

ညစာအတူစားပြီး ရယ်မောပျော်ရွှင်စေတယ်။ ပြီးတော့Marbella ကမ်းခြေလိုက်ပို့ပြီး အပန်းဖြေစေခဲ့ပါတယ်။

အဲဒီလုပ်ရပ်တွေရဲ့အကျိုးကျေးဇူးအဖြစ် စပါးက ပထမဆုံးပရီးမီးယားလိဂ်နိုင်ပွဲ ပိုင်ဆိုင်ခဲ့ပါပြီ။

တန်းတက်ကိုဗင်ထရီအသင်းကို အနိုင်ယူပြီး စပါးနိုင်ပွဲမရသေးတဲ့အမည်းစက်ကို ဖယ်ရှားလိုက်ပြီ။

စပါးရဲ့နိုင်ပွဲမှာသူရဲကောင်းဖြစ်ခဲ့သူက ၁၈ လကြာမှ ပထမဆုံးပွဲထွက်ကစားခွင့်ရသူ မက်ဒီဆန်ပါ။

မက်ဒီဆန်က ဒူးအရွတ်ဒဏ်ရာကြောင့် ပြီးခဲ့တဲ့ တစ်ရာသီလုံးနီးပါး အနားယူခဲ့ရတယ်။

အခု အသင်းဟောင်းကိုဗင်ထရီနဲ့ပွဲမှာ မက်ဒီဆန်က ဂိုးသွင်းယူပြီး သူ့ရဲ့Trademark မြားပစ်တဲ့ပုံစံနဲ့ အောင်ပွဲခံခဲ့ပါတယ်။

ပြီးတော့ စပါးအသင်းအမှတ်တံဆိပ်ကို မြတ်နိုးစွာနမ်းရှိုက်ပြလိုက်ပါတယ်။

မက်ဒီဆန်က အခုလိုမျိုးအောင်ပွဲမခံရတာ ကြာပါပြီ။ ၂၀၂၅ ခုနှစ်၊ ဖေဖော်ဝါရီလအတွင်းကစားတဲ့ မန်ယူနဲ့ပွဲမှာ ဂိုးသွင်းယူပြီးနောက် မက်ဒီဆန် ဂိုးပေါက်ပျောက်ခဲ့တာပါ။

၂၀၂၅ ခုနှစ်၊ ဧပြီလအတွင်းကစားတဲ့ လီဗာပူးလ်နဲ့ပွဲမှာ ပွဲထွက်ကစားသမားအဖြစ် မက်ဒီဆန် နောက်ဆုံးပါဝင်ခဲ့ပြီး

အဲဒီကာလအတွင်း စပါးအသင်းက ပရီးမီးယားလိဂ် ၄၉ ပွဲမှာ ၁၁ ပွဲသာနိုင်ပြီး ၂၃ ပွဲ ရှုံးနိမ့်ခဲ့ပါတယ်။

ကိုဗင်ထရီကို နိုင်ခဲ့တာဟာ စပါးအတွက် ပရီးမီးယားလိဂ် အိမ်ကွင်းနောက်ဆုံး ၃၇ ပွဲမှာ ၆ ပွဲမြောက် နိုင်ပွဲ၊

၂၀၂၆ ခုနှစ်အတွင်း၄ ပွဲမြောက် ပရီးမီးယားလိဂ်နိုင်ပွဲ  ဖြစ်ခဲ့ပါတယ်။

အခုလိုမျိုး ၃ ဂိုးအထိ သွင်းယူနိုင်တာကလည်း ပြီးခဲ့တဲ့ရာသီအစ ဘန်လေအသင်းနဲ့ပွဲစဉ်နောက်ပိုင်း ပထမဆုံးအကြိမ်ဖြစ်ပါတယ်။

စပါးအတွက် ဂိုးပြတ်နိုင်ပွဲအပြင် ကျေနပ်စရာကောင်းတဲ့အရာတွေက မာမွတ်ရှ် ဂိုးပေါက်တွေ့ခဲ့တာ၊ ကာလရှည်အနားယူနေရတဲ့ ကူလူဆက်ဗ်စကီး ပြန်ကစားနိုင်ခဲ့တာတွေပါ။

စပါးအသင်းနည်းပြ ဒီဇာဘီက ပထမဆုံးပရီးမီးယားလိဂ်နိုင်ပွဲအတွက် ဂုဏ်ယူနေပြီး " အခုထက်ပိုကောင်းအောင်

ကြိုးစားသွားမယ်၊ နိုင်ပွဲတွေထပ်ယူပြမယ်" လို့ ကြွေးကြော်လိုက်ပါတယ်။