ဒဏ်ရာရ ခေါင်းဆောင်တစ်ဦး

ဒဏ်ရာနေ့စွဲတွေဟာ ရစ္စဂျိမ်းစ်ကို စိတ်ကျရောဂါ ဖြစ်စေတယ်။ တစ်ကိုယ်တည်းအထီးကျန်ဆန်စေတယ်။

ပွဲတွေမကစားရလို့ကိုယ့်ကိုယ်ကို စိတ်ပျက်ဒေါသထွက်မိတယ်။ ရစ္စဂျိမ်းစ်စိတ်ထဲမှာစွဲကပ်နေတာတစ်ကိုယ်ရေစာ ကျော်ကြားမှုမဟုတ်ဘူး။

ချယ်လ်ဆီးကိုကူညီလိုစိတ်၊ အဲဒီအရာကလွဲပြီး ဘယ်အရာကမှရစ္စဂျိမ်းစ်အတွက် အရေးမကြီးပါဘူး။

ဒူးဒဏ်ရာက ရစ္စဂျိမ်းစ်ကို ကာလရှည်အနားပေးခဲ့ပြီး တံကောက်ကြောဒဏ်ရာက ထပ်ခါထပ်ခါ သတ်ခဲ့ပါတယ်။

ရစ္စဂျိမ်းစ်က ပြီးခဲ့တဲ့လေးနှစ်အတွင်း တံကောက်ကြောဒဏ်ရာ ၈ ကြိမ်အထိရခဲ့ပါတယ်။

ပြီးတော့ ဒူးဒဏ်ရာ၊ ပေါင်ဒဏ်ရာ၊ ခြေချင်းဝတ်ဒဏ်ရာ တွေကြောင့်လည်း ကာလအတန်ကြာနားခဲ့ရဖူးတယ်။

အခုလည်း ရစ္စဂျိမ်းစ် က ဒူးဒဏ်ရာကြောင့် ၃ လလောက်အနားယူရဦးမယ်။

ရစ္စဂျိမ်းစ်က အသက် ၆ နှစ်အရွယ်ကစတင်ပြီး ချယိလ်ဆီးအရိပ်အောက် ခိုလှုံခဲ့ပါတယ်။

အကယ်ဒမီကစားသမားဘဝကို ဖြတ်သန်းပြီး ချယ်လ်ဆီးအသင်းခေါင်းဆောင်ဘဝ ကူးပြောင်းလာခဲ့တယ်။

၂၀၁၉ ခုနှစ်အတွင်းကစားတဲ့ ဂရင်းစ်ဘေးတောင်းအသင်းနဲ့ပွဲမှာချယ်လ်ဆီးကစားသမားဘဝ ပထမဆုံးဂိုး သွင်းယူနိုင်ခဲ့သူဟာ

၂၀၂၀ ခုနှစ်မှာလက်ရွေးစင်ကစားသမားဖြစ်လာခဲ့တယ်။ ၂၀၂၁ ခုနှစ်မှာ ချယ်လ်ဆီးနဲ့အတူ ချန်ပီယံလိဂ်ဖလား ပိုင်ဆိုင်ခဲ့တယ်။

၂၀၂၃ ခုနှစ်မှာ ချယ်လ်ဆီးအသင်းခေါင်းဆောင်ရာထူး ရရှိခဲ့တာပါပဲ။

ပြီးခဲ့တဲ့လေးရာသီအတွင်းမှာ ဒဏ်ရာနတ်ဆိုးက ရစ္စဂျိမ်းစ်ကို အစွမ်းကုန် နှိပ်စက်ပေမယ့် ယိုင်လဲမသွားဘဲ သန်မာမြဲသန်မာခဲ့တယ်။

ရစ္စဂျိမ်းစ်ကနေရာစုံအသုံးတော်ခံနိုင်ခဲ့ပါတယ်။ နေရာဘယ်လောက်စုံအောင်ကစားရလဲဆိုရင် ဘယ်နောက်ခံလူဖြစ်ခဲ့တဲ့အထိပါပဲ။

အတွေ့အကြုံရင့်ပြီးခေါင်းဆောင်စိတ်ပိုင်ဆိုင်ထားသူ ရစ္စဂျိမ်းစ်က အားနည်းချက်ရှိတဲ့ချယ်လ်ဆီးခံစစ်အတွက် အားကိုးရသူဖြစ်ခဲ့တယ်။

ချယ်လ်ဆီးကစားသမားတွေရဲ့ တိုက်ပွဲဝင်စိတ်ဓာတ်ကိုလှုံ့ဆော်ပေးနိုင်ပြီး သူကိုယ်တိုင်လည်းအစွမ်းကုန်ပေးဆပ်တတ်သူပါ။

ရစ္စဂျိမ်းစ်ရဲ့ကစားသမားဘဝမှာ Father Figure က သီယာဂိုဆေးလ်ဗားပါ။ သီယာဂိုဆေးလ်ဗားက ရစ္စဂျိမ်းစ်ရဲ့အဖေနဲ့အသက်သိပ်မကွာဘူး။

ချယ်လ်ဆီးမှာသူတို့နှစ်ဉီး ရေစက်ဆုံချိန် သိပ်မကြာပေမယ့် ရစ္စဂျိမ်းစ်က သီယာဂိုဆေးလ်ဗားကို သိပ်ပြီးခင်တွယ်ခဲ့ပါတယ်။

စာသင်ကျောင်းမှာ ရစ္စဂျိမ်းစ်က အထူးချွန်ဆုံးကျောင်းသား မဖြစ်ခဲ့ဘူး။ ဒါပေမဲ့ ဘောလုံးကွင်းထဲမှာ ရစ္စဂျိမ်းစ်က လူရည်ချွန်ပဲ။

ရစ္စဂျိမ်းစ်က ဘောလုံးမျိုးရိုးရှိတယ်။ သူ့အဖေက နည်းပြ၊သူ့အစ်ကိုနဲ့ သူ့ညီမက  ဘောလုံးသမား၊ ဒီလိုနဲ့ပဲ ရစ္စဂျိမ်းစ်ဟာ Football Mad ဖြစ်လာခဲ့တယ်။

ရစ္စဂျိမ်းစ်တို့အိမ်နောက်ဘက် ခြံဝန်းမြက်ခင်းပြင်မှာ မိသားစုဘောလုံးပွဲလေး ရှိခဲ့ဖူးတယ်။

ချာတိတ်ဘဝမှာ ဘောလုံးကစားတဲ့အခါ ရစ္စဂျိမ်းစ်က တိုက်စစ်မှူးဖြစ်ဖူးတယ်၊ တောင်ပံကစားသမား ဖြစ်ဖူးတယ်၊ ကွင်းလယ်လူ ဖြစ်ဖူးတယ်၊

ကွင်းလယ်လူနေရာကစားရတာကို ရစ္စဂျိမ်းစ် မုန်းရတဲ့ အကြောင်းရင်းက ဘောလုံးသိပ်မရလို့ပါ။

ဒီလိုနဲ့ပဲ ညာနောက်ခံလူဘဝကိုရစ္စဂျိမ်းစ် အသွင်ပြောင်းခဲ့တာ ဖြစ်ပါတယ်။

ဒရော့ဘာကို လေးစားလွန်းလို့ ရစ္စဂျိမ်းစ်က တိုက်စစ်ကစားခဲ့တာပါ။   အခုတော့လည်း ခံစစ်ကစားသမားဘဝမှာ ရစ္စဂျိမ်းစ် ပျော်ရွှင်နေပါပြီ။

သီယာဂိုဆေးလ်ဗားကို Idol အဖြစ်သတ်မှတ်ထားသူဟာ သီယာဂိုဆေးလ်ဗားလိုမျိုး ဂန္ထဝင်ခံစစ်ကစားသမားဖြစ်ချင်တယ်။ ဂိုးတွေသွင်းချင်ပါတယ်။

သူ့ဘဝရဲ့မမေ့နိုင်စရာအကောင်းဆုံးညတစ်ညအကြောင်းမေးတဲ့အခါ ချန်ပီယံလိဂ် ဖလားရတဲ့ညဆိုပြီး ပြောပြခဲ့တယ်။