ပရီးမီးယားလိဂ်ရဲ့Big Six ခေတ် ပြီးဆုံးပြီလား?

ပရီးမီးယားလိဂ်မှာ Big Six Era ကို နှစ်ကာလများစွာ မြင်ခဲ့ရတယ်။

နည်းပြပိုချက်တီနိုနဲ့အတူ စပါးအသင်း အင်အားကြီးမားလာချိန်မှာ အာဆင်နယ်၊ ချယ်လ်ဆီး၊ လီဗာပူးလ်၊ မန်ယူ၊ မန်စီးတီးတို့နဲ့အတူ ပရီးမီးယားလိဂ် Big Six Era စတင်ခဲ့တာပါ။

လက်ရှိအချိန်မှာ ပရီးမီးယားလိဂ် Big Six အသင်းတွေထဲ မန်ယူနဲ့ စပါးက အိမ်နိမ့်စံဖြစ်နေလို့ Big Six Era အဆုံးသတ်ပြီဆိုပြီး ယူဆသူတွေရှိပါတယ်။

မန်ယူနဲ့ စပါးအသင်းတို့ရဲ့နေရာတွေကို ဗီလာ၊ ဘရိုက်တန်၊ ဘရန့်ဖို့ဒ်အသင်းတွေက ခြိမ်းခြောက်ခဲ့လို့လည်း အဲဒီယူဆချက်ဟာ အမှန်တရားလို ဖြစ်လာတာပါ။

Big Six Era ကို ပျက်စီးစေမယ့် နောက်ထပ်အချက်က မန်စီးတီးရဲ့ဘဏ္ဍာရေးအရှုပ်အထွေးပါ။

မန်စီးတီးသာ တန်းဆင်းပြစ်ဒဏ် ကျခံရတဲ့အထိ ကြီးကြီးမားမား အရေးယူခံရမယ်ဆိုရင် ပရီးမီးယားလိဂ် Big Six Era အဆုံးသတ်ပါပြီ။

စွမ်းဆောင်ရည်အင်အားအရ Big Six နယ်မြေထဲ ဗီလာ၊ ဘရိုက်တန်၊ ဘရန့်ဖို့ဒ်အသင်းတွေ တိုးဝင်လာပေမယ့် ဘဏ္ဍာရေးအင်အားအရတော့

မန်ယူ၊ မန်စီးတီး၊ အာဆင်နယ်၊ စပါး၊ လီဗာပူးလ်၊ ချယ်လ်ဆီးအသင်းတွေကို မယှဉ်နိုင်သေးပါဘူး။

အဲဒီအသင်းတွေက ဝင်ငွေအကောင်းဆုံးအသင်း ၁၀ သင်းစာရင်းဝင်နေဆဲပါ။

ပြီးခဲ့တဲ့ ဆယ်စုနှစ်တစ်ခုအတွင်းမှာ ပရီးမီးယားလိဂ်ချန်ပီယံဆုကို လက်စတာက ဒဏ္ဍာရီဆန်ဆန် ပိုင်ဆိုင်ခဲ့တာကလွဲလို့

Big Six အသင်းစာရင်းဝင်တွေပဲ ချန်ပီယံဖြစ်ခဲ့ပါတယ်။ ၂၀၁၀-၁၁ ရာသီကနေ ၂၀၁၈-၁၉ ရာသီအတွင်းမှာ

Big Six အသင်းတွေက ပရီးမီးယားလိဂ်အမှတ်ပေးဇယား အဆင့် ၁ ကနေ ၆ အတွင်းနေရာကို ငါးရာသီအထိ သိမ်းပိုက်နိုင်ခဲ့ပါတယ်။

ဒါပေမဲ့ အဲဒီကာလနောက်ပိုင်း ၆ ရာသီမှာတော့ Big Six အသင်းတွေ ပရီးမီးယားလိဂ်အမှတ်ပေးဇယား အဆင့် ၆ အတွင်းဝင်တာ တစ်ရာသီပဲရှိခဲ့တယ်။

စပါးက တန်းမဆင်းရအောင် ရုန်းကန်နေရပြီး မန်ယူကလည်း ခေတ်ပျက်လို့မဆုံးနိုင်လို့ Big Six Era ဟာ အပြောင်းအလဲ ဖြစ်လာတာပါ။

ပြီးခဲ့တဲ့ ၆ ရာသီအတွင်းမှာ မန်စီးတီးရဲ့ပရီးမီးယားလိဂ် Average Position က အဆင့် ၂ ၊ လီဗာပူးလ်နဲ့  အာဆင်နယ်က Average Position အဆင့် ၃၊

မန်ယူနဲ့ ချယ်လ်ဆီးက Average Position အဆင့် ၆ ၊ စပါးက Average Position အဆင့် ၁၀ ဖြစ်ခဲ့ပါတယ်။

Big Six အသင်းတွေရဲ့အင်အားလျော့သွားရတဲ့ အကြောင်းရင်းတစ်ခုက နယူးကာဆယ်ကို ဆော်ဒီစော်ဘွားတွေပိုင်ဆိုင်ခဲ့တာပါ။

ဆော်ဒီတွေပိုင်ဆိုင်ပြီးနောက် ပရီးမီးယားလိဂ်က Big Seven ဖြစ်လာနိုင်တယ်လို့ ထင်ကြေးပေးခဲ့ကြတယ်။

ဒါပေမဲ့ နယူးကာဆယ်က ငွေကြေးသုံးစွဲမှုကို တစ်ရာသီပြီးတစ်ရာသီ ကန့်သတ်လာလို့ Big Seven Era ဖြစ်မလာခဲ့ဘူး။

ဒါပေမဲ့ နယူးကာဆယ်က ဗီလာ၊ ဘရိုက်တန်၊ ဘရန့်ဖို့ဒ်အသင်းတွေလို Big Six အသင်းတွေအတွက် မဟာရန်သူဖြစ်ခဲ့ပါတယ်။

ဘရိုက်တန်အသင်း ကတော့ နယူးကာဆယ်လို ငွေလမ်းမခင်းနိုင်ပေမယ့် Data နဲ့ Scouting ကို အသုံးချပြီး ပါရမီရှင်အသစ်တွေရှာဖွေနိုင်ခဲ့ပါတယ်။

ကိုင်စီဒို၊ ကူကူရယ်လာ၊ မက်အယ်လစ်စတာတို့ကို တန်ဖိုးနည်းနည်းနဲ့ သိမ်းပိုက်ပြီး စံချိန်တင်ရောင်းချခဲ့တယ်။

ဘရိုက်တန်က Player Trading အသင်းအဖြစ် ထင်ရှားလာပြီး ပရီးမီးယားလိဂ်ဖျက်မြင်းဘဝရောက်လာပါတယ်။

ချယ်လ်ဆီး၊ စပါးနဲ့ မန်ယူတို့ရဲ့နည်းပြအပြောင်းအလဲ များတာကလည်း Big Six Era ကို အင်အားနည်းစေတယ်။

၂၀၂၀-၂၁ ရာသီနောက်ပိုင်းမှာ ချယ်လ်ဆီးက နည်းပြ ၇ ဦး၊ စပါးက နည်းပြ ၆ ဦး၊ မန်ယူက နည်းပြ ၅ ဦးအထိအပြောင်းအလဲဖြစ်ပြီး မတည်ငြိမ်ခဲ့ပါဘူး။

ပရီးမီးယားလိဂ်အစ ၁၉၉၂ ခုနှစ်မှာ အာဆင်နယ်၊  အဲဗာတန်၊ လီဗာပူးလ်၊ မန်ယူ၊ စပါးဆိုပြီး 'Big Five' ခေတ် ရှိခဲ့ဖူးတယ်။

အဲဒီနောက် ၁၉၉၄ ခုနှစ်ကနေ ၂၀၀၀ ပြည့်နှစ်ကျော်အစပိုင်းကာလတွေအထိ မန်ယူနဲ့အာဆင်နယ် နှစ်သင်းတည်းကြီးစိုးတဲ့ Big Two ခေတ်မြင်ခဲ့ရတယ်။

အဲဒီနောက် မန်ယူနဲ့အာဆင်နယ် Big Two ခေတ်ကနေ ချယ်လ်ဆီးနဲ့ လီဗာပူးလ်ပါဝင်တဲ့ Big Four ခေတ်၊ ရောက်လာတယ်။

၂၀၁၀-၁၁ ရာသီမှာတော့ Big Six ခေတ်ရောက်ခဲ့တာပါ။ ပြီးခဲ့တဲ့နှစ်တွေအတွင်းမှာ Big Six အသင်းတွေရဲ့

အရှိန်အဝါကျဆင်းလာပြီး ခေတ်အပြောင်းအလဲဖြစ်လာမလားစောင့်ကြည့်ရမယ်။