ကျွန်တော်အကောင်းဆုံး လုပ်ခဲ့ပါတယ် (မိုက်ကယ်ကာရစ်)

ကိုမိုအသင်းကို ဂိုးပြတ်ရှုံးနိမ့်ပြီးနောက် မိုက်ကယ်ကာရစ်ရဲ့မန်ယူနည်းပြဘဝ အဆုံးသတ်လုနီးပါး ဖြစ်လာခဲ့တယ်။

မန်ယူအသင်းခေါင်းဆောင် ဘရူနိုဖာနန်ဒက်စ်က မိုက်ကယ်ကာရစ်ရဲ့နည်းစနစ်တွေကို ဝေဖန်ပြီး ကစားသမားတွေဘက်က အပြစ်မရှိသလိုမျိုး ပြောခဲ့ပါတယ်။

မိုက်ကယ်ကာရစ်ကရော လက်ရှိရလဒ်ဆိုးတွေနဲ့ပတ်သက်ပြီး ဘာပြောခဲ့ပါသလဲ။

မေးခွန်း - ကစားသမားတွေကြောင့် စိတ်ပျက်ခဲ့ရသလား။

ဖြေ - ကျွန်တော်က ဒီကိစ္စကို ကိုယ်ရေးကိုယ်တာအနေနဲ့ မခံယူပါဘူး။ ဒါဟာ ဘောလုံးအသင်းနဲ့ သက်ဆိုင်တဲ့ အရာအားလုံးနဲ့ ပတ်သက်နေပါတယ်။

ခင်ဗျားတို့ ဘာတွေလုပ်သလဲ၊ ဘယ်လိုပြုမူနေထိုင်သလဲ၊ ကွင်းထဲမှာ ဘယ်လိုစွမ်းဆောင်ရည်ပြသသလဲ၊ အရာရာကို ဘယ်လိုချဉ်းကပ်လုပ်ဆောင်သလဲဆိုတာတွေပါ။

ပိုအရေးကြီးတာက ဒီဘောလုံးအသင်းကို ကိုယ်စားပြုနေသူတွေအနေနဲ့ ကိုယ့်မှာရှိတဲ့ တာဝန်ကို သိရှိဖို့ပါပဲ။

ဒါဟာ ဘောလုံးအသင်းအကြောင်း၊ ကျွန်တော်တို့ ကိုယ်စားပြုထားတဲ့ အရာတွေအကြောင်းနဲ့ အသင်းပရိသတ်တွေအကြောင်းပါပဲ။

ပြဿနာက ဂိုးတွေ ပေးလိုက်ရတာတစ်ခုတည်း မဟုတ်ပါဘူး။ တချို့အချိန်တွေမှာ ကျွန်တော်တို့ရဲ့ခံယူချက်နဲ့ ကစားပုံကလည်း ပြဿနာဖြစ်ခဲ့တာပါ။

မေး - ရာထူးက နုတ်ထွက်ဖို့စဥ်းစားနေပြီလား။

ဖြေ -  အခုအချိန်မှာ ကျွန်တော်ရဲ့ရာထူးနဲ့ ကျွန်တော့်ရဲ့ ကိုယ်ပိုင်ခံစားချက်တွေက အဓိကမဟုတ်ပါဘူး။

အဓိကက အသင်းတစ်သင်းအနေနဲ့ရော၊ ဘောလုံးကလပ်တစ်ခုအနေနဲ့ပါ ကျွန်တော်တို့ ဘယ်လိုပုံစံမျိုး ဖြစ်ချင်သလဲ၊ ဘယ်လိုပုံစံမျိုး ဖြစ်သင့်သလဲဆိုတာပါပဲ။

ကျွန်တော်ပြောခဲ့သလိုပဲ ရလဒ်တွေက တစ်ခါတလေ ကောင်းလိုက်၊ ဆိုးလိုက် ဖြစ်နိုင်ပါတယ်။ ဒါပေမဲ့ ကျွန်တော်တို့ လုပ်ဆောင်ရမယ့်ပုံစံ၊

ကစားရမယ့်ပုံစံဆိုတာ ရှိပါတယ်။ အခု ကျွန်တော်တို့အသင်းပုံစံက အဲဒီလိုမဟုတ်ခဲ့ပါဘူး။

မေး - မန်ယူကစားသမားတွေက မိုက်ကယ်ကာရစ်အတွက်ကစားပေးနေလား။

ဖြေ -  ကျွန်တော့်အတွက် ကစားပေးဖို့ မဟုတ်ပါဘူး။

မန်ယူအသင်းအတွက် ကစားပေးဖို့ကိစ္စပါ။ ဒီဘောလုံးအသင်းနဲ့ အသင်းပရိသတ်တွေအတွက် ကျွန်တော်မှာ တာဝန်ရှိပါတယ်။

ကျွန်တော်က အချိန်တိုင်း အကောင်းဆုံးကြိုးစားပါတယ်။ တကယ်ကို အစွမ်းကုန် ကြိုးစားနေတာပါ။ မန်ယူအသင်းကို ကျွန်တော် တကယ်ချစ်ပါတယ်။

ကျွန်တော့်ဘဝတစ်ခုလုံးနီးပါးက ဒီအသင်းနဲ့ပဲ ဆက်စပ်နေတာပါ။ အရာရာက အဆင်ပြေချင်ပြေမယ်၊ အဆင်မပြေတာတွေလည်း ရှိချင်ရှိမယ်။

ဒါပေမဲ့ ကျွန်တော် တတ်နိုင်သမျှ အားလုံးကို စိတ်ရင်းအမှန်နဲ့ ပေးဆပ်လုပ်ဆောင်နေပါတယ်။

တကယ်တော့ ဒါဟာ ကျွန်တော်နဲ့ ကစားသမားတွေအကြားက ဆက်ဆံရေးအကြောင်း မဟုတ်ပါဘူး။

ကစားသမားတွေအပါအဝင် ဝန်ထမ်းအားလုံးက ဒီဘောလုံးအသင်းအတွက် ဘယ်လောက်အထိ ပေးဆပ်ကြသလဲဆိုတာကသာ အဓိကပါပဲ။

မိုက်ကယ်ကာရစ်ရဲ့စကားလုံးတွေက မန်ယူကစားသမားတွေဟာ အသင်းအတွက်ပေးဆပ်ကစားလိုစိတ်မရှိဘူးလို့

ရည်ရွယ်ပါတယ်။ မိုက်ကယ်ကာရစ်ကတော့သူတစ်ယောက်တည်းညံ့တာမဟုတ်ဘူး၊ ကစားသမားတွေလည်းအပြစ်ရှိတယ်ဆိုပြီး တုံ့ပြန်ထားတယ်။

သူအကောင်းဆုံးလုပ်ခဲ့ပါတယ်လို့ မိုက်ကယ်ကာရစ် ယုံကြည်နေတယ်။