သံမဏိအရည်ပျော်ချိန်

ကွန်ပနီဆိုတာ ကစားသမားဘဝမှာ စိတ်ဓာတ်ခိုင်မာပြီး ကြမ်းကြမ်းတမ်းတမ်းကစားတတ်သူဖြစ်လို့ သံမဏိဂုဏ်ပုဒ်ပိုင်ဆိုင်ခဲ့ပါတယ်။

ဘောလုံးသမိုင်းတစ်လျှောက် စိတ်ဓာတ်အခိုင်မာဆုံး နောက်ခံလူတစ်ဦးအဖြစ် ထင်ရှားခဲ့ပါတယ်။

နည်းပြဘဝရောက်လာချိန်မှာလည်း ကွန်ပနီက အလုပ်ကြိုးစားပြီး စိတ်ဓာတ်ခိုင်မာတဲ့ခေါင်းဆောင်အဖြစ်မြင်ခဲ့ရတယ်။

ဘိုင်ယန်မြူးနစ်အသင်းကို တိုက်စစ်အားသန်ဖိတ်ဖိတ်လက်အသင်းအဖြစ် ဖန်ဆင်းပြထားပါတယ်။

ဒါပေမဲ့ နည်းပြဘဝရဲ့ကြမ်းတမ်းလွန်းတဲ့ဖိအားတွေဟာ ကွန်ပနီရဲ့သံမဏိစိတ်ဓာတ်ကို အရည်ပျော်စေခဲ့တယ်။

လေ့ကျင့်ရေးကွင်းမှာ ရုတ်တရက်လဲကျသွားပြီး ကျန်းမာရေးအခြေအနေမတည်မငြိမ်ဖြစ်ခဲ့တာပါ။

ဘိုင်ယန်မြူးနစ်အသင်းအတွက် စိတ်ရောကိုယ်ပါ အာရုံစိုက်ထားတဲ့ ကွန်ပနီက စိတ်ဖိစီးမှုများတဲ့ဒဏ်၊ အိပ်ရေးမဝတဲ့ဒဏ်၊ အစားပုံမှန်မစားတဲ့ဒဏ်တွေကြောင့်

အခုလို ဖြစ်ရတာပါ။ ကွန်ပနီက အမြဲတမ်းလန်းဆန်းနေအောင်ကော်ဖီတွေလည်း အလွန်အကျွံ သောက်လို့ ပိုဆိုးခဲ့ရပါတယ်။

ကွန်ပနီက တင်ပါးမှာဒဏ်ရာရထားတဲ့အပြင် ဗိုင်းရပ်စ်တစ်မျိုးလည်းကူးစက်ခံထားရလို့ သူ့ရဲ့ခန္ဓာကိုယ်က သူ့အလိုကိုမလိုက်နိုင်တော့ပါဘူး။

ဒီလိုနဲ့ပဲလေ့ကျင့်ရေးကွင်းမှာ ရုတ်တရက်လဲကျ၊ဆေးရုံရောက်ခဲ့ရတာပါ။ ကွန်ပနီက အခုအချိန်မှာဆေးရုံက ဆင်းခွင့်ရထားပေမယ့် သူချစ်တဲ့ဘောလုံးကွင်းတွေဆီ

ပြန်လာနိုင်ဖို့မလွယ်သေးပါဘူး။ ဦးနှောက်အမြှေးပါး ယောင်ရမ်းမှုကြောင့် ကွန်ပနီတစ်ယောက်စိတ်ရောကိုယ်ပါ အနားယူဖို့လိုအပ်နေတာပါ။

ကွန်ပနီအနားယူနေရချိန်မှာ ဘိုင်ယန်မြူးနစ်က ယိမ်းယိုင်မသွားဘဲ ဂျာမန်ဖလားပွဲမှာ ဂိုးပြတ် အနိုင်ရခဲ့ပါတယ်။

ဘောလုံးသမားဘဝမှာ အကြမ်းပတမ်းခံပြီး ဒဏ်ရာပေါင်းများစွာ၊ တိုက်ပွဲပေါင်းများစွာကို ကျော်ဖြတ်ပြခဲ့တဲ့ သံမဏိလူသား ကွန်ပနီတစ်ယောက်

အကောင်းဆုံးပြန်လာနိုင်ပါစေလို့ဆုတောင်းပေးလိုက်ပါတယ်။