မန်စီးတီးကို ကမ္ဘာပျက်စေခဲ့သူ

မန်စီးတီးကို ကမ္ဘာပျက်စေခဲ့သူ

လက်ရှိအချိန်မှာ မန်စီးတီးရပ်ဝန်းက ကမ္ဘာပျက်နေတယ်။ မန်စီးတီးကို ကမ္ဘာပျက်အောင် စတင်မီးမွှေးခဲ့သူက

ရူအီပင်တိုလို့အမည်ရတဲ့ ပေါ် တူဂီသား Hacker ပါ။

သူက Football Leaks လို့အမည်ရတဲ့ဝက်ဘ်ဆိုက်ကနေ ကလပ်အသင်းတွေရဲ့ဘဏ္ဍာရေးအရှုပ်အထွေးကို အစဆွဲထုတ်ခဲ့ပါတယ်။

မန်စီးတီးရဲ့အမှုပေါင်း ၁၁၅ မှုကလည်း ရူအီပင်တို အစဆွဲထုတ်ခဲ့ရာကနေ ကမ္ဘာသိပြီးပရီးမီးယားလိဂ်က စစ်ဆေးခဲ့တာပါ။

ရူအီပင်တိုက Hacker တစ်ဦးဖြစ်လို့ ကျင့်ဝတ်နဲ့မညီတဲ့၊ ရပ်ကွက်ဆန်ဆန်ပြောရရင် " သူခိုး" ဆန်တဲ့အပြုအမူတွေ ကျူးလွန်ခဲ့ပေမယ့်

သူ့ကြောင့်သာ Beautiful Game ရဲ့Darkside တွေ သိခွင့်ရတာပါ။

ရူအီပင်တိုက ဘယ်လိုရည်ရွယ်ချက်နဲ့ အခုလိုမျိုး Hacker ဖြစ်ခဲ့တာလဲ။ မန်စီးတီးအသင်းဆီကနေ ငွေညှစ်ချင်ခဲ့တာများလား။

ဒါမှမဟုတ် သူ့မှာ တရားမျှတမှုလိုအပ်တယ်ဆိုတဲ့ ခံစားချက် ရှိခဲ့မယ်ထင်တယ်။

ရူအီပင်တိုရဲ့ပုံစံကတစ်ခါမြင်လိုက်ရုံနဲ့ မှတ်မိနိုင်ပါတယ်။ မျက်ခုံးမွေးကောင်းကောင်း၊ ဆံပင်ထောင်ထောင်နဲ့ ရုပ်ရှင်ထဲက Hacker အထာမျိုးပါ။

သူ့ရဲ့ဆရာဟောင်း မာရီယိုဖယ်လ်ကာအိုက ရူအီပင်တိုဟာ ငယ်ငယ်ကအတိုင်းပဲလို့ ပြောတယ်။

ပေါ်တူဂီနိုင်ငံက ခြံဝန်းသေးသေးလေးနဲ့ အိမ်ဝင်းငယ်တစ်ခုမှာ ရူအီပင်တိုရဲ့ကလေးဘဝအချိန်အတော်များများကုန်ဆုံးခဲ့ပါတယ်။

ရူအီပင်တိုက လူတိုင်းနဲ့ အဆင်ပြေပြီးသဘောကောင်းတဲ့ ကျောင်းသားဖြစ်ပေမယ့် ကိုယ့်ကိုယ်ကိုယုံကြည်စိတ်ပြင်းထန်လွန်းသူ၊ Extrovert မဟုတ်ဘူး။

ကျောင်းမကြာခဏပျက်ပေမယ့် အဖေကအထိန်းအသိမ်းကောင်းလို့ မပျက်စီးခဲ့ပါဘူး။

ကွန်ပြူတာကိုတော့ ခပ်ငယ်ငယ်အရွယ်ကတည်းက စိတ်ဝင်စားစိတ်ပြင်းထန်ခဲ့တယ်။ သူစိတ်နှစ်ပြီးလုပ်လေ့ရှိတယ်။

ကွန်ပြူတာရှေ့မှာ အထိုင်််််များသူ ရူအီပင်တိုက GYM မသွားဘဲ McDonald's ဆိုင်ကိုအသွားများပါတယ်။

ပေါ် တို့မြို့အနီး Douro မြစ်ဘေးနားက မြို့လေးရဲ့ နာမည်ကျော် Escola Secundaria Almeida Garrett မှာ ပညာသင်ခဲ့ပါတယ်။

သူ့အဖေက ဖိနပ်စက်ရုံမှာအလုပ်လုပ်ပြီး နောက်ပိုင်းမှာ ရှေးဟောင်းပစ္စည်းရောင်းဝယ်သူဖြစ်လာတယ်။

အမေကတော့ ရူအီပင်တို အသက် ၁၁ နှစ်အရွယ်မှာ ကွယ်လွန်ခဲ့တယ်။

ဆရာဟောင်း မာရီယိုဖယ်လ်ကာအိုက "Football Leaks တည်ထောင်သူက ရူအီပင်တိုမှန်း သိချိန်မှာ သိပ်ပြီးအံ့အားသင့်မိတယ်" လို့ပြောပြတယ်။

တရားမျှတမှုအတွက် ရလာတဲ့ပြဿနာတွေနဲ့အတူ ရူအီပင်တို အဆင်ပြေပါ့မလားဆိုပြီးတော့လည်း မာရီယိုဖယ်လ်ကာအို စိုးရိမ်ခဲ့တယ်။

ပေါ် တိုအသင်းကို အရူးအမူး အားပေးစိတ်ကြောင့် ရူအီပင်တိုက ထိပ်သီးအသင်းတွေရဲ့လျှို့ဝှက်ချက်ကို

Hack ခဲ့တယ်ဆိုပေမယ့် ရူအီပင်တိုက တရားမျှတချင်တဲ့ခံစားချက်ရှိခဲ့ပါတယ်။

"Hero' or a 'thief'?"  "သူရဲကောင်းလား" " သူခိုး" လား ဆိုတဲ့ မေးခွန်းတွေကြား ရူအီပင်တို ပိတ်မိနေခဲ့တယ်။

လူတွေရဲ့ အမြင်တွေက မတူညီကွဲပြားခဲ့ပါတယ်။

ပေါ်တူဂီနိုင်ငံ နိုင်ငံရေးလောကမှာထင်ရှားသူ  Ana Gomes က ရူအီပင်တို ထောင်ကျနေချိန်မှာ သွားတွေ့ပြီးကူညီအားပေးခဲ့တယ်။

" ရူအီပင်တိုက တရားစွဲခံရမယ့်သူမဟုတ်၊ ကာကွယ်ပေးရမယ့်သူ" လို့ပြောခဲ့ပါတယ်။

ရူအီပင်တိုကို Whistleblower အဖြစ် မြင်လာကြတယ်။ တရားရေးရာတာဝန်ရှိသူတွေရဲ့အကြံပေးအဖြစ် ခန့်အပ်သင့်တယ်လို့တောင်းဆိုလာကြတယ်။

Catch Me If You Can ဇာတ်လမ်းထဲက ချက်လက်မှတ်အတုလုပ်တဲ့လီယိုနာဒိုလိုပေါ့။ နောက်ပိုင်းမှာ လီယိုနာဒိုက အစိုးရနဲ့ပူးပေါင်းပြီး

ချက်လက်မှတ်အတု စစ်ဆေးဖော်ထုတ်ရေးအတွက် ပူးပေါင်းခဲ့တယ်။

ရူအီပင်တိုကလည်း အကျင့်ပျက်ခြစားသူတွေ၊ အပြစ်လုပ်သူတွေကို အစိုးရနဲ့ပူးပေါင်းပြီး  ဖော်ထုတ်ပေးနိုင်သူပါ။

တချို့ကလည်းသူ့ကို ရော်ဘင်ဟုဒ်နဲ့ ခိုင်းနှိုင်းကြတယ်။ အများကောင်းကျိုးအတွက် မဟုတ်တာတွေလုပ်သူပေါ့။

ကျွန်တော့်ရဲ့အမြင်အရ ရူအီပင်တိုကို  Whistleblower နဲ့ Hacker ကြားထားချင်ပါတယ်။

အချက်အလက်တွေကို တရားမဝင်နည်းနဲ့ ရခဲ့ပေမယ့်  ဥရောပဘောလုံးရဲ့ အမှောင်ဘက်ခြမ်းကို လူအများသိအောင် ဖော်ထုတ်ပေးခဲ့တယ်။

စာရွက်စာတန်း သန်း ၇၀ ကျော်ကို ထုတ်ပေးခဲ့ပြီး  မန်စီးတီး၊ PSG စတဲ့အသင်းကြီးတွေရဲ့ ဘဏ္ဍာရေးအရှုပ်အထွေး စုံစမ်းစစ်ဆေးခံခဲ့ရတယ်။

"သူတို့မှာ ကွယ်ဝှက်ထားစရာ ဘာမှ မရှိရင်  ပြဿနာလည်း မရှိနိုင်ပါဘူး" 

ဒါပေမဲ့ ကွယ်ဝှက်ထားတာတွေရှိလို့ မန်စီးတီးက ပြဿနာအကြီးကြီးတက်နေပါပြီ။

မန်စီးတီး ဘယ်လိုအရေးယူခံရမလဲဆိုတာက ရူအီပင်တိုရဲ့အသက်ပါပဲ။

သေချာတာက ရူအီပင်တိုဆီမှာ အာဏာကြီးမားတဲ့ ရန်သူတွေ ရှိနေပါတယ်။