အန်ဖီးလ် ရောဂါ

အန်ဖီးလ် ရောဂါ

အန်ဖီးလ်မှာ နိုင်ပွဲမယူတတ်တဲ့ရောဂါ ဖြစ်နေတယ်။ (၆၃) နှစ်အတွင်းမှာ အခုလိုမျိုး နိုင်ပွဲမယူတတ်တဲ့

ရောဂါဖြစ်တာ အခုတစ်ကြိမ်နဲ့ဆိုရင်  သုံးကြိမ်ရှိခဲ့တယ်။

ချန်ပီယံလိဂ်မှာ အက်သလက်တီကိုအသင်းကို အနိုင်ရလို့ ပျော်ရွှက်ဂုဏ်ယူမဆုံးဖြစ်နေဆဲ လီဗာပူးလ်က

ဖူလ်ဟမ်လို ၇ ဂိုးပေးထားရတဲ့အသင်းနဲ့ တွေ့ချိန် ဂိုးမရှိသရေကျခဲ့တာနာကျင်စရာပါ။

ယုံကြည်ချက်ကင်းမဲ့နေတဲ့ ဖူလ်ဟမ်ကို အနိုင်မယူနိုင်ခဲ့တာဟာ လီဗာပူးလ်နည်းပြ အိုင်ရာအိုလာကို ဖိအားပိုစေတယ်။

အိုင်ရာအိုလာက ပွဲပန်းဒဏ်ကြောင့် ဆိုပြီး အကြောင်းပြတယ်။  တကယ်လည်း လီဗာပူးလ်က

အခွင့်အရေး ဖန်တီးနိုင်စွမ်း နိမ့်ကျလာပါတယ်။

လီဗာပူလ်က လက်ရှိရာသီမှာ ရှုံးပွဲမရှိပေမယ့် စွဲမက်ဖွယ်ရာအဆင်းမရှိဘူး။

လက်ရှိရာသီ  ပရီးမီးယားလိဂ်လေးပွဲမှာ တန်းတက်အစ်ဝစ်ချ်တစ်သင်းကိုပဲအနိုင်ရထားပါတယ်။

နော်တင်ဟမ်ဖောရက်စ်၊ ဖူလ်ဟမ်တို့နဲ့ပွဲတွေမှာ နောက်ကလိုက်ကစားပြီးမှ သရေတစ်မှတ်ရခဲ့တာပါ။

ရှုံးပွဲမရှိပေမယ့် ဂုဏ်ယူစရာမကောင်းတဲ့ အခြေအနေကြောင့် လီဗာပူးလ်ဂိုးသမား အယ်လစ်ဆန် မပျော်ရွှင်ပါဘူး။

အယ်လစ်ဆန်က " သုံးပွဲသရေကျပြီး ရှုံးပွဲမရှိသေးတာက လီဗာပူးလ်လိုအသင်းအတွက်

အကြီးအကျယ်အောင်ပွဲခံရမယ့်အရာမျိုး မဟုတ်ဘူး။ အခုထက်ပိုပြီးအားစိုက်ကစားရမယ်၊

စိတ်ဓာတ်ခိုင်မာရမယ်" လို့ သတိပေးလိုက်တယ်။

ပေါင် ၃၆၄ သန်းတန်ဖိုးရှိတဲ့ အီဆက်ခ်၊ ဘာကိုလာ၊ ဖလော်ရီယန်ဗက်ဇ် အစုအဖွဲ့က ဖူလ်ဟမ်နဲ့ပွဲမှာ

ဂိုးဖြစ်နိုင်မယ့်အခွင့်အရေး တစ်ကြိမ်မှမဖန်တီးနိုင်ခဲ့ဘူး။

အီဆက်ခ်က မိနစ်ကိုးဆယ်စလုံးမှာ ဘောလုံးထိချက် ၁၆ ကြိမ်ပဲရှိခဲ့တယ်။

နော်တင်ဟမ်ဖောရက်စ်နဲ့ပွဲတုန်းကလည်း အီဆက်ခ်ကအခုထက်ပိုဆိုးခဲ့ပြီး ဘောလုံးထိချက် ၁၄ ကြိမ်ပဲရှိပါတယ်။

ဘာကိုလာက ပရီးမီးယားလိဂ်ရဲ့ရုပ်ပိုင်းဆိုင်ရာ စိန်ခေါ် သံကို အကောင်းဆုံးရင်မဆိုင်နိုင်သေးဘူး။

ဒီလိုနဲ့ပဲ အန်ဖီးလ်မှာ နိုင်ပွဲမရတဲ့ရောဂါကို လီဗာပူးလ် ဆက်လက်ခံစားခဲ့ရတယ်။

ကုရာနတ္တိဆေးမရှိတဲ့ ရောဂါမဟုတ်ပေမယ့် လီဗာပူးလ်နည်းပြ အိုင်ရာအိုလာ အမြန်ဆုံးဖြေရှင်းရမယ့် ပြဿနာပါ။