အပယ်ရတနာ

တစ်ချိန်တုန်းက ဂျက်ဆန်ဟာအလွဲဘုရင်ကြီး ဖြစ်ဖူးတယ်။ ဂိုးသမားမရှိတဲ့ဂိုးပေါက်ထဲ မိုး ပေါ် ထောင်ကန်ခဲ့ဖူးတယ်။

ဒီလိုနဲ့ပဲ ဂျက်ဆန်ဟာ လှောင်ရယ်သံတွေကြား ပိတ်မိခဲ့တယ်။ ချယ်လ်ဆီးရပ်ဝန်းရဲ့အဝေး နှင်ထုတ်ခံရတယ်။ ပရီးမီးယားလိဂ်ရပ်ဝန်းနဲ့ ဝေးကွာခဲ့တယ်။

လူမစွမ်းနတ်မဆိုသလို ဘိုင်ယန်မြူးနစ်ကို ဂျက်ဆန် ရောက်သွားပေမယ့် ထူးထူးခြားခြား မရှိခဲ့ပါဘူး။

နောက်ဆုံး ချယ်လ်ဆီးကို ပြန်ရောက်လာပြီး ပွဲထွက်ခွင့်ရဖို့ မရေမရာဘဝနဲ့ရင်ဆိုင်ခဲ့ရတယ်။

အခြားတစ်ဘက်မှာ ဗီလာအသင်းက ဝက်ကင်စ်နေရာ အစားထိုးရအောင်တိုက်စစ်မှူးတစ်ဦး ရှာဖွေခဲ့ပါတယ်။

ဗီလာနည်းပြ အူနိုင်းအမ်မရီက ဗီလာရီးယဲလ်မှာ ကိုယ်ရောင်ကိုယ်ဝါတောက်ပဖူးသူ ဂျက်ဆန်ကို ယုံကြည်ခဲ့ပါတယ်။

ဝက်ကင်စ်လိုမျိုး ဗီလာအတွက် တစ်ရာသီသွင်းဂိုး ဆယ်ဂိုးအထက်သွင်းယူပေးနေတဲ့ တိုက်စစ်မှူးနေရာ အစားဝင်ရတာ မလွယ်ကူပါဘူး။

ဒါပေမဲ့ ဂျက်ဆန်က ဝက်ကင်စ်ကို ဗီလာအသင်းပရိသတ်တွေမေ့အောင် စွမ်းဆောင်ပြခဲ့တယ်။

ဗီလာကစားသမားဘဝ ပထမဆုံး ၁၁ ပွဲမှာ ဂျက်ဆန်က ၇ ဂိုးအထိသွင်းပြထားပါတယ်။

ဂျက်ဆန်ရဲ့သွင်းဂိုးတွေနဲ့အတူ ဗီလာကချန်ပီယံလိဂ်မှာ အဖွင့်လှနေသလို၊ ပရီးမီးယားလိဂ်မှာလည်းမန်စီးတီးကိုအနိုင်ရတဲ့အထိ အမြင့်ပျံနေပါတယ်။

ဂျက်ဆန်က " အသင်းဖော်တွေ၊ နည်းပြ၊ ဗီလာအသင်းနဲ့အရာအားလုံးက အတော်လေးထက်မြက်ပါတယ်။

ဗီလာမှာကစားခွင့်ရလို့ ပျော်ရွှင်မိပြီး အံ့အားသင့်စရာအရာတွေဖန်တီးနိုင်ဖို့မျှော်လင့်ထားပါတယ်" လို့ ပြောပါတယ်။

မန်စီးတီးကို ဗီလာအသင်း အနိုင်ရတဲ့ပွဲမှာ ဂျက်ဆန်က ဂိုးနှစ်ဂိုးစလုံး သွင်းယူပေးပြီး တစ်ချိန်တုန်းကလှောင်ရယ်သံတွေရင်ဆိုင်ရဖူးတဲ့

ပရီးမီးယားလိဂ်မှာ သူရဲကောင်းအဖြစ်ထည်ဝါခဲ့ပါတယ်။

" ဂိုးတွေအများကြီး ထပ်သွင်းဦးမယ်" လို့ ဂျက်ဆန် ကြွေးကြော်လိုက်ပါတယ်။

ဗီလာက ဂျက်ဆန်အတွက် နတ်ရေကန်ပါ။

အပယ်ခံဘဝကနေ ရတနာတစ်ပါးလို ဂျက်ဆန်အသွင်ပြောင်းခဲ့ပါတယ်။