Super Sub တွေ စန်းပွင့်လာတဲ့ ပရီးမီးယားလိဂ်နဲ့ လွမ်းစရာ Super Sub တစ်ဦးအကြောင်း

လက်ရှိရာသီပရီးမီးယားလိဂ်မှာ လူစားဝင်ကစားသမားတွေရဲ့သွင်းဂိုးပိုများလာပါတယ်။

Super Sub တွေရဲ့ခေတ်လို့ ဆိုရလောက်အောင် လူစားဝင်ကစားသမားတွေရဲ့သွင်းဂိုးက လက်ရှိရာသီပရီးမီးယားလိဂ်

သွင်းဂိုးစုစုပေါင်းရဲ့၁၃ ရာခိုင်နှုန်းအထိ ရှိလာပါတယ်။ အဲဒီအရေအတွက်ဟာ ပြီးခဲ့တဲ့တစ်ရာသီလုံးက လူစားဝင်ကစားသမားတွေရဲ့သွင်းဂိုးရာခိုင်နှုန်းနဲ့တူညီနေပါတယ်။

ပရီးမီးယားလိဂ်ရဲ့မေ့မရနိုင်တဲ့ Super Sub တွေအကြောင်းပြန်တွေးလိုက်ရင်

ဒီဖိုး၊ ဂျရူး၊ ဝဲလ်ဘက်၊ ဟာနန်ဒက်ဇ်၊ စတာရစ်ချ်၊ ဆိုးလ်ရှားတို့က ခေါင်းထဲအရင်ဆုံးရောက်လာပါတယ်။

ဒီဖိုးက လူစားဝင်ကစားသမားအဖြစ် ၂၄ ဂိုးသွင်းယူခဲ့ပြီး ပရီးမီးယားလိဂ်သမိုင်းမှာ စံချိန်တင်ထားပါတယ်။

ဒီဖိုးရဲ့နောက်မှာ ဂျရူးက ၂၁ ဂိုး၊ ဝဲလ်ဘက်နဲ့ ဟာနန်ဒက်ဇ်က ၁၉ ဂိုး၊ ဆိုးလ်ရှားက ၁၇ ဂိုးနဲ့ အစဉ်လိုက်ရပ်တည်နေတာပါ။

ပရီးမီးယားလိဂ်သမိုင်းတစ်လျှောက် Super Sub အဖြစ် သွင်းဂိုးအများဆုံးကစားသမားတွေထဲ ဂန္ထဝင်အဆန်ဆုံးက ဆိုးလ်ရှား ဖြစ်ပါလိမ့်မယ်။

ဖာဂူဆန်ဖန်ဆင်းပေးတဲ့ မန်ယူတခေတ်မှာ ဆိုးလ်ရှားရဲ့Super Sub ဂိုးတွေက သိပ်ပြီးတန်ဖိုးရှိခဲ့တယ်။

၁၉၉၉ ချန်ပီယံလိဂ်ဖိုင်နယ်ဟာ ဆိုးလ်ရှားရဲ့ဘဝကို အပြောင်းလဲကြီးပြောင်းလဲစေခဲ့တယ်။

ဘိုင်ယန်မြူးနစ်ကို မန်ယူအသင်း တစ်ဂိုးဂိုးမရှိနဲ့ ရှုံးနေချိန်မှာ ဆိုးလ်ရှားကဝင်ကစားချင်လွန်းလို့ မရိုးမရွ ဖြစ်ခဲ့ပါတယ်။

သူ့ကိုဝင်ကစားခွင့်မပေးလို့လည်း ဖာဂူဆန်ကို ဒေါသထွက်နေပါတယ်။

ပွဲချိန် ၈၁ မိနစ်ရောက်မှ ဆိုးလ်ရှားဝင်ကစားခွင့်ရပေမယ့် မန်ယူရဲ့ဂန္ထဝင်ဖလားသုံးလုံးအောင်ပွဲကိုဖန်ဆင်းပေးသူအဖြစ်သမိုင်းတွင်ခဲ့တယ်။

ပွဲချိန် ၉၃ မိနစ်မှာသွင်းယူတဲ့ ဆိုးလ်ရှားရဲ့အနိုင်ဂိုးဟာ ချန်ပီယံလိဂ်သမိုင်းရဲ့အကောင်းဆုံးပြဇာတ် ဖြစ်ခဲ့ပါတယ်။

ဆိုးလ်ရှားက " ပွဲချိန် မိနစ်၈၀ အထိအရန်ခုံထိုင်နေရလို့ နည်းပြကို ကျနော်ဒေါသထွက်ခဲ့ပါတယ်။ ဘာလို့ငါ့ကိုမကစားခိုင်းတာလဲ၊

ပွဲရှုံးနေတာလေ၊ ဘောလုံးက စိတ်ခံစားချက်တွေများလွန်းပြီး အသင်းရှုံးနေချိန်မှာ ကွင်းထဲဝင်ကစားချင်တာ သဘာဝပါပဲ" လို့ ပြန်ပြောပြတယ်။

ဆိုးလ်ရှားက ဘိုင်ယန်မြူးနစ်နဲ့ ချန်ပီယံလိဂ်ဖိုင်နယ်မှာ ၁၅ မိနစ်သာကစားရပေမယ့် တသက်မမေ့နိုင်စရာ ၁၅ မိနစ်ဖြစ်ခဲ့ပါတယ်။

မန်ယူအသင်းရဲ့သမိုင်းသာမကဘဲ ဆိုးလ်ရှားရဲ့ကစားသမားဘဝသမိုင်းပါ ပြောင်းလဲခဲ့ပါတယ်။

ချန်ပီယံလိဂ်ဖိုင်နယ်ကြောင့် ဆိုးလ်ရှားကပိုကောင်းတဲ့ ကစားသမားဖြစ်မလာပေမယ့် ခံယူချက်ပြောင်းလဲခဲ့တယ်။

ကံတရားကဆိုးလ်ရှားရဲ့မန်ယူကစားသမားဘဝ ပိုပြီးထင်ရှားကျော်ကြားအောင် Supersub အဖြစ် ဖန်ဆင်းပေးခဲ့ပါတယ်။

မန်ယူကစားသမားဘဝ ၁၁ နှစ်တာကာလအတွင်း ဆိုးလ်ရှားက Super Sub အဖြစ် ပျော်ရွှင်စွာအသုံးတော်ခံခဲ့ပါတယ်။

ဖာဂူဆန်ထားရာနေ၊စေရာသွား၊ မန်ယူကိုချစ်မြတ်နိုးစိတ်နဲ့အတူ နောက်ကျဂိုးတွေသွင်းပြီး ပြိုင်ဘက်အသင်းတွေအထိတ်လန့်ဆုံး Baby face Killer ဖြစ်ခဲ့ပါတယ်။

ဖာဂူဆန်က ပွဲပြီးဖို့ ဆယ်မိနစ်၊ ဆယ်ငါးမိနစ်အလိုမှာ ဆိုးလ်ရှားကိုကွင်းထဲထည့်ခါနီးတိုင်း " ဂိုးသွင်းပြလိုက်စမ်း" ဆိုပြီး လှုံဆော်ပေးတတ်တယ်။

ဆိုးလ်ရှားကလည်း ပြိုင်ဘက်ခံစစ်ကစားသမားတွေ မောပန်းနွမ်းလျချိန်မှာအကောင်းဆုံးအခွင့်အရေး ယူပြီးအသည်းခွဲဂိုးတွေသွင်းပြခဲ့တယ်။

အရန်ခုံထိုင်နေရပြီး ပွဲပြီးခါနီးမှ ကစားခွင့်ရပေမယ့် ဆိုးလ်ရှားက ဘယ်တုန်းကမှစိတ်မပျက်ခဲ့ဘူး။

သူဝင်ကစားခွင့်ရချိန်တိုင်း အကောင်းဆုံးပေးဆပ်ခဲ့ပါတယ်။ Super Sub ဆိုတဲ့စကားလုံးဟာ ဆိုးလ်ရှားနဲ့သိပ်ပြီးလိုက်ဖက်ပါတယ်။

လက်ရှိရာသီပရီးမီးယားလိဂ်မှာ Super Sub တွေရဲ့ဂိုးတွေပိုမြင်လာရလို့ တစ်ချိန်တုန်းက Super Sub တွေကို လွမ်းမောစရာပါ။