၃၈ ပွဲကစား ၃၈ မှတ်ဆိုရင် တန်းဆင်းရလိမ့်မယ် မန်ယူ

လက်ရှိရာသီပရီးမီးယားလိဂ်မှာ မန်ယူက ၆ ပွဲကစား  ၆ မှတ်နဲ့ အိမ်နိမ့်စံဖြစ်နေပါတယ်။

၁၉၈၆-၈၇ ရာသီ၊ ဖာဂူဆန်ခေတ်က ပရီးမီးယား လိဂ် ၆ ပွဲကစားပြီး ၄ မှတ်သာရပြီးနောက် အဆိုးရွားဆုံးမှတ်တမ်း ပိုင်ဆိုင်ခဲ့တာပါ။

ယာယီနည်းပြဘဝမှာ မိုက်ကယ်ကာရစ်က ပရီးမီးယားလိဂ် ၁၇ ပွဲတာဝန်ယူပြီး နိုင်ပွဲ ၁၂ ပွဲဲ၊ သရေ ၃ ပွဲ၊ ရှုံးပွဲ ၂ ပွဲပိုင်ဆိုင်ခဲ့ပါတယ်။

မန်ယူရဲ့အမြဲတမ်းနည်းပြဖြစ်လာပြီးနောက် မိုက်ကယ်ကာရစ်က ပရီးမီးယားလိဂ် ၆ ပွဲမှာ ၁ ပွဲသာ အနိုင်ရခဲ့တယ်။

ယာယီနည်းပြဘဝနဲ့ အမြဲတမ်းနည်းပြဘဝဟာ နိဗ္ဗာန်နဲ့ ငရဲလိုကွာခြားခဲ့တယ်။

မန်ယူအသင်းက နောက်ဆုံးနှစ်ပွဲဆက် အမှတ်ပေးဇယားအောက်ဆုံးကအသင်းတွေကို အနိုင်မရခဲ့ဘူး။

လက်ရှိရာသီပရီးမီးယားလိဂ်မှာတစ်ယောက်လျော့နဲ့ကစားရတဲ့နှစ်ပွဲစလုံး မန်ယူ ရလဒ်ဆိုးခဲ့တယ်။

မန်ယူက ပြီးခဲ့တဲ့ရာသီကလို ချန်ပီယံလိဂ်ဝင်ခွင့် ရဖို့ မလွယ်ကူဘဲ တန်းဆင်းဇုန်နဲ့ နီးသထက်နီးကပ်လာတယ်။

မန်ယူအသင်းဘုတ်အဖွဲ့က မိုက်ကယ်ကာရစ်ကို ထောက်ခံဆဲဆိုပေမယ့် မန်ယူအသင်းပရိသတ်တွေက စိတ်ပျက်ဒေါသထွက်နေကြပြီ။

မိုက်ကယ်ကာရစ်ကိုလှောင်ပြောင်နေကြပြီ။ လွန်ခဲ့တဲ့နှစ်ရာသီတုန်းက တန်ဟက်ဂ်လိုမျိုး ရာသီအစ ၉ ပွဲကစားပြီးချိန်မှာ

နိုင်ပွဲ ၂ ပွဲသာပိုင်ဆိုင်တဲ့ အခြေအနေဆိုးကို မိုက်ကယ်ကာရစ်လက်ထက်မန်ယူ ရင်ဆိုင်ရဖွယ်ရှိပါတယ်။

လက်ရှိအချိန်မှာ မန်ယူက ပြိုင်ပွဲစုံ ၈ ပွဲကစားပြီး နိုင်ပွဲ ၂ ပွဲသာရထားတယ်။

လာမယ့် ၉ ပွဲမြောက်က အက်သလက်တီကိုအသင်းနဲ့ ဖြစ်လို့ မန်ယူနိုင်ပွဲရဖို့ မဖြစ်နိုင်ပါဘူး။

ဒီတော့မိုက်ကယ်ကာရစ်ရဲ့မန်ယူအသင်းက တန်ဟက်ဂ်လက်ထက် မှတ်တမ်းဆိုးနဲ့ ထပ်တူကျတော့မယ်။

အချိန်ကာလကလည်း မန်ယူရဲ့နည်းပြထုတ်ပယ်နေကျ အချိန် ဖြစ်နေပြီ။ တန်ဟက်ဂ်တုန်းက အောက်တိုဘာလကုန်ပိုင်း မှာ ရာထူးကနေထုတ်ပယ်ခံရတယ်။

လက်ရှိအောက်တိုဘာလအတွင်းမှာ မန်ယူအသင်း ပွဲကျပ်နေလို့ စွမ်းရည်တိုးတက်အောင်မလုပ်နိုင်ဘူးဆိုရင် မိုက်ကယ်ကာရစ်ရဲ့ရာထူးက စတေးရတော့မှာပါ။

မိုက်ကယ်ကာရစ် သူ့အသင်းသားတွေကို ယုံကြည်နေဆဲပါ။ အသင်းကောင်းတစ်သင်းဖြစ်နေဆဲလို့ ယုံကြည်နေဆဲပါ။

ဒါပေမဲ့ မန်ယူအသင်းကစားသမားတွေရဲ့ခံယူချက်နဲ့ ကြိုးစားအားထုတ်လိုစိတ်က အဝီစိရောက်နေပါတယ်။

မန်ယူအသင်းကစားသမားတွေက အားကြိုးမာန်တက် ပြေးလွှားကစားလိုစိတ်မရှိကြဘူး။ ပွဲတိုင်းနီးပါးမှာ

မန်ယူကစားသမားတွေက ပြိုင်ဘက်ကစားသမားတွေထက် High-speed Run နည်းလွန်းခဲ့ပါတယ်။

မန်ယူအသင်းက Physical battle တွေမှာလည်း တဆင့်နိမ့်နေပါတယ်။

စပါးအသင်းနဲ့ပွဲမှာ ဆိုလန်ကီရဲ့ ချေပဂိုးပေးလိုက်ရတာ မာတီနက်ဇ်တစ်ယောက် Physical Battle အားနည်းလို့ပါ။

ဂယ်ရီနဗီးလ်က မန်ယူအတွက် Worrying Day စိုးရိမ်ဖွယ်ရာနေ့ရက်တွေ ရောက်လာပြီလို့သတိပေးလိုက်တယ်။

တကယ်ဆိုရင် မန်ယူရဲ့အခြေအနေက စိုးရိမ်ဖွယ်ရာထက် ပိုပါတယ်။ ကုရာနတ္တိဆေးမရှိဘူး ဖြစ်နေတယ်။

လက်ရှိရာသီ ပရီးမီးယားလိဂ်မှာ တစ်ပွဲတစ်မှတ်ထက်ပိုမရသေးတဲ့ မန်ယူက ၃၈ ပွဲကစားပြီး ၃၈ မှတ်ဆိုရင် တန်းဆင်းသွားရနိုင်ပါတယ်။