အီတလီရဲ့အကူးအပြောင်းကာလ

အီတလီရဲ့အကူးအပြောင်းကာလ

အီတလီက ကမ္ဘာ့ဖလားမကစားရတာ သုံးကြိမ်ဆက်တိုင်ခဲ့ပြီ။ ဒါဟာ ကမ္ဘာ့ဖလားသမိုင်းတစ်လျှောက်

အအောင်မြင်ဆုံးအသင်းတစ်သင်းအတွက် ဖြစ်ရပ်ဆိုးကြီးပဲ။

အီတလီအသင်းက ဆုဖလားအောင်ပွဲတွေနဲ့ နှစ်ကာလများစွာ ဝေးကွာနေတဲ့အသင်း မဟုတ်ဘူး။

ယူရို ၂၀၂၀ ချန်ပီယံဖလားကို သိမ်းပိုက်ထားတဲ့ အသင်းပါ။ ဒါပေမဲ့ အဲဒီချန်ပီယံဆု သိမ်းပိုက်ပြီးနောက် အီတလီက ကပ်ဘေးကြီးရင်ဆိုင်လိုက်ရတယ်။

မျိုးဆက် တစ်ခု အဆုံးသတ်သွားတယ်။

အီတလီဘောလုံးလောကဟာ ပြန်လည်ကယ်တင်ရေး စီမံကိန်းအတွက် ဘူဖွန်၊ မာလ်ဒီနီ၊ ဂတ်တူဆိုတို့လို

အီတလီဂန္ထဝင်တွေလည်း အားတက်သရောပါဝင်ခဲ့တယ်။ ဒါပေမဲ့ အဇူရီအပြာရောင်တိမ်သားတွေရဲ့ အုံ့မှိုင်းချိန်ဟာရှည်ကြာလွန်းခဲ့ပါတယ်။

အီတလီဂိုးသမားဒွန်နာရမ်မာက  " ကမ္ဘာ့ဖလားသုံးကြိမ်ဆက် ကစားခွင့်မရတာ စိတ်ထိခိုက်စရာကောင်းလွန်းပါတယ်" လို့ ပြောဖူးပါတယ်။

အဲဒီလိုကမ္ဘာ့ဖလား ကစားခွင့်မရတဲ့နာကျင်ဖွယ်ရာ ဒုက္ခကို ကွယ်ပျောက်အောင် နည်းပြ မန်စီနီ စွမ်းဆောင်ပြရပါမယ်။

မန်စီနီက နည်းပြဘဝမှာ မမေ့နိုင်စရာအောင်ပွဲတွေ ပိုင်ဆိုင်ခဲ့သူပါ။

အီတလီအတွက်နောက်ဆုံးအောင်ပွဲ ယူရို၂၀၂၀ ချန်ပီယံဆုကိုရယူပေးထားသူလည်း ဖြစ်ပါတယ်။

လွမ်းမောဖွယ်ရာ လွန်ခဲ့တဲ့နှစ် ၂၀ ကို ပြန်ကြည့်တဲ့အခါ အီတလီက ကမ္ဘာ့ဖလားချန်ပီယံ ဖြစ်ဖူးတယ်။

အဲဒီနောက်ပိုင်း အီတလီက ကမ္ဘာ့ဖလားရှုံးထွက်အဆင့် လုံးဝမရောက်တော့ဘဲ နိုင်ပွဲတစ်ပွဲသာရခဲ့တယ်။

 ၂၀၁၄ ဘရာဇီးလ်ကမ္ဘာ့ဖလားမှာ အဂ်လန်ကို နှစ်ဂိုးတစ်ဂိုးနဲ့ အနိုင်ရခဲ့တာပါ။

အဲဒီအချိန်တုန်းက အီတလီမှာ ဘူဖွန်၊ ကင်နာဗာရို၊  နက်စတာ၊ ဂတ်တူဆို၊ပီယာလို၊ တော့တီ၊ ဒီရော့ဆီ၊

ဒယ်လ်ပီယာရိုတို့နဲ့ ကြယ်တွေစုံခဲ့တယ်။ အီတလီမျိုးဆက်ဟာ တဖြေးဖြေး အရောင်မှိန်လာပြီး မျိုးဆက် ပြတ်ခဲ့ရတယ်။

၂၀၂၀ ခုနှစ်ကနေ ၂၀၂၅ ခုနှစ်အတွင်းမှာ အီတလီရဲ့ကစားသမားထုတ်ကုန်အရေအတွက်ဟာ ၄၁၃ ဦးသာရှိပြီး

အမေရိကန်၊ ဂျပန်၊ ရုရှားတို့ထက် နည်းခဲ့ပါတယ်။  တစ်ချိန်တုန်းက အီတလီရဲ့မဟာပြိုင်ဘက် ဘရာဇီးလ်ရဲ့

ကစားသမားထုတ်ကုန်အရေအတွက်ဟာ သုံးထောင်ကျော်နဲ့အများဆုံး ဖြစ်နေတာပါ။

ပရီးမီးယားလိဂ်၊ လာလီဂါ၊ ဘွန်ဒစ်လီဂါပြိုင်ပွဲတွေက လူငယ်ကစားသမားတွေ အပြိုင်းအရိုင်း

ပွဲထုတ်နေချိန်မှာ အီတလီဘောလုံးလောကမှာ လူငယ်မျိုးဆက်သစ်မရှိခဲ့ဘူး။

၂၀၂၅ ခုနှစ်၊ ဇွန်လကနေ ၂၀၂၆ ခုနှစ်၊ ဖေဖော်ဝါရီလအတွင်းမှာ အီတလီလက်ရွေးစင်အသင်းအတွက် ပွဲထွက်ကစားခွင့်ရတဲ့

အသက် ၂၄ နှစ်အောက် ကစားသမားက အက်စ်ပိုဆီတိုတစ်ဉီးပဲရှိခဲ့တယ်။ အဲဒီကာလအတွင်းမှာ အဂ်လန်လက်ရွေးစင်အသင်းအတွက်

ပွဲထွက်ခွင့်ရတဲ့ အသက် ၂၄ နှစ်အောက် ကစားသမားအရေအတွက်ဟာ ဒါဇင်နဲ့ချီရှိခဲ့ပါတယ်။

ပြီးတော့ စီးရီးအေမှာကစားခွင့်ရတဲ့ အသက် ၂၁ နှစ်အောက် ကစားသမားအရေအတွက်က ၁ ဒဿမ ၉ ရာခိုင်နှုန်းပဲရှိတယ်။

ဒါဟာကမ္ဘာတဝန်းထိပ်တန်း လိဂ်ပြိုင်ပွဲ ၅၀ မှာ ယူအေအီးလိဂ်ပြီးရင် ဒုတိယအနည်းဆုံးပါ။

စီးရီးအေက ဒီဘရိုင်းနား၊ လူကာကူ၊ မိုဒရစ်၊ ဗာဒီတို့လို အရွယ်လွန်ကစားသမားတွေကို တန်ဖိုးထားနေရသလို၊

ထိပ်တန်းနည်းပြတွေလည်း စိတ်မဝင်စားပါဘူး။ ကွန်တီ၊ အယ်လီဂရီ၊ ဂတ်တူဆို၊ စပယ်လက်တီ၊

ဆာရီစတဲ့နည်းပြတွေဟာ အလှည့်ကျစနစ်နဲ့ စီးရီးအေထိပ်တန်းအသင်းတွေကို တာဝန်ယူနေရတယ်။

စီးရီးအေကလူ့စွမ်းအားအရင်းအမြစ် နိမ့်ပါးလွန်းပြီး အီတလီအသင်းကိုပါ ရိုက်ခတ်မှုကြီးမားလာတယ်။

မန်စီနီက အပြောင်းအလဲကို ပုံဖော်နေပြီး အသက် ၂၃ နှစ်အောက် ကစားသမား ၁၁ ဦးကို အီတလီအသင်းမှာ ရွေးချယ်ထားတယ်။

ဒေါ့မွန်က အသက် ၁၈ နှစ်အရွယ်တိုက်စစ်မှူး အီနာစီယို၊ ခရစ္စတယ်ပဲလေ့စ်နောက်ခံလူ အာရှ်နော်၊ ဘရန့်ဖို့ဒ်က

ကာယိုဒီစတဲ့လူငယ်ကြယ်ပွင့်တွေ မြင်လာရတယ်။

မန်စီနီရဲ့မျိုးဆက်သစ်အီတလီအသင်းက  နေးရှင်းလိဂ်မှာ ပြင်သစ်၊ ဘယ်လ်ဂျီယံ၊ တူရကီတို့နဲ့ အုပ်စုကျပ်နေပါတယ်။

မန်စီနီရဲ့အကူးအပြောင်းကာလ စမ်းသပ်ခန်းကကြမ်းတမ်းပါတယ်။

အဇူရီကိုနှစ်ကာလများစွာ ကြွေခဲ့ရသူတွေအတွက် အရင်လိုရွှေအိုရောင်နေ့ရက်တွေ လွမ်းမောရုံကတစ်ပါး အခြားမရှိနိုင်ပါဘူး။