ဒရော့ဘာနောက်ပိုင်း ၁၆ နှစ်ကြာ ဝေးကွာနေတဲ့ ပရီးမီးယားလိဂ် ရွှေဖိနပ်ဆုကို ချယ်လ်ဆီးအသင်းဆီ ပြန်လည်ယူဆောင်ပေးဖို့ မျှော်လင့်ခံနေရတဲ့ တိုက်စစ်မှူး ယော်အိုပတ်ဒရိုရဲ့ ခြေစွမ်းသုံးသပ်ချက်။
ဒရော့ဘာနောက်ပိုင်းမှာ ပရီးမီးယားလိဂ်ရွှေဖိနပ်ဆုရတဲ့ ချယ်လ်ဆီးကစားသမား မရှိတော့ဘူး။
ဒရော့ဘာက ၂၀၁၀ ခုနှစ်မှာ ပရီးမီးယားလိဂ်ရွှေဖိနပ်ဆု ရခဲ့တာဖြစ်လို့
ပရီးမီးယားလိဂ်ရွှေဖိနပ်ဆုနဲ့ ချယ်လ်ဆီးကစားသမားတွေရေစက်မဆုံတာ ၁၆ နှစ်ရှိပါပြီ။
ချယ်လ်ဆီးရပ်ဝန်းနဲ့ ၁၆ နှစ်ကြာဝေးကွာနေတဲ့ ပရီးမီးယားလိဂ်ရွှေဖိနပ်ဆုကို
ပြန်လည်သိမ်းပိုက်ပေးမယ့်သူအဖြစ် ယော်အိုပတ်ဒရို ရပ်တည်နေပါတယ်။
လက်ရှိရာသီ ပရီးမီးယားလိဂ် သွင်းဂိုးအများဆုံးကစားသမား စာရင်းမှာ ယော်အိုပတ်ဒရိုက ဒုတိယနေရာရပ်တည်နေတယ်။
ထိပ်ဆုံးက ဟာလန်း သွင်းဂိုး ၆ ဂိုးနဲ့ တစ်ဂိုးပဲကွာလို့ ယော်အိုပတ်ဒရိုရဲ့မျှော်လင့်ချက်အားကောင်းနေတာပါ။
ဟာလန်းလို ဂိုးသွင်းဘုရင်ဆုနဲ့ ယဉ်ပါးနေသူကို ကျော်ဖြတ်ပြီး ယော်အိုပတ်ဒရိုဂိုးသွင်းဘုရင်ဖြစ်လာဖို့က အတော်လေးခက်ခဲနိုင်ပါတယ်။
ဒါပေမဲ့ ပါလ်မာ၊ မော်ဂန်ရော်ဂျာစ် တို့လို တိုက်စစ်အသင်းဖော်ကောင်းတွေနဲ့ အတူကစားခွင့်ရတာ ယော်အိုပတ်ဒရိုအတွက် အားသာချက်ပါ။
ပြီးတော့ ဟာလန်းက ဂိုးပဲသွင်းတတ်တာပါ။ ယော်အိုပတ်ဒရိုက တိုက်စစ်တစ်ခုလုံး သရုပ်ဖော်ပေးနိုင်တယ်။
လက်ရှိရာသီပရီးမီးယားလိဂ်မှာ သူက ပွဲကစားချိန် ၄၃၂ မိနစ်အတွင်း ၅ ဂိုးသွင်းပြီး ဂိုးဖန်တီးမှု ၃ ကြိမ် လုပ်ထားပါတယ်။
ပရီးမီးယားလိဂ်ပွဲစဉ် ၆ အပြီးမှာ သွင်းဂိုးပါဝင်ပတ်သက်မှု ၈ ကြိမ်အထိ ပိုင်ဆိုင်ထားတာလေးစားစရာပါ။
ယော်အိုပတ်ဒရိုကြောင့် ပါလ်မာနဲ့ မော်ဂန်ရော်ဂျာစ် တိုက်စစ်ဇုန်ထဲနေရာလွတ်တွေပိုရလာတယ်။
သူတို့သုံးဦးပေါင်းတိုက်စစ်က ထက်မြက်နေပြီး BBC တိုက်စစ်၊ MSN တိုက်စစ်တို့လိုဖြစ်လာမလား စောင့်ကြည့်ရမယ်။
သေချာတာက ယော်အိုပတ်ဒရိုက ချယ်လ်ဆီးရဲ့ ကျောနံပါတ် ၉ ကျိန်စာကို ဖယ်ရှားပစ်ခဲ့ပါပြီ။
ပြီးခဲ့တဲ့ရာသီမှာသူက ဒီယေဂိုကော်စတာနောက်ပိုင်း ချယ်လ်ဆီးအတွက်
တစ်ရာသီအတွင်း သွင်းဂိုးနှစ်ဆယ်နဲ့အထက် သွင်းယူနိုင်သူအဖြစ် ထည်ဝါခဲ့တယ်။
လက်ရှိရာသီမှာ ဒရော့ဘာ နောက်ပိုင်း ပရီးမီးယားလိဂ် ရွှေဖိနပ်ဆုပိုင်ဆိုင်မယ့်
ပထမဆုံးချယ်လ်ဆီးကစားသမား အဖြစ် ယော်အိုပတ်ဒရို မျှော်လင့်ခွင့်ရှိနေပါပြီ။